Tre anije me afro 59 mijë ton qymyr dhe çimento në një javë
6 tetor 2017
Sot në mbëmje në radën portuale pritet anija “Yanning Sea” me gjatësi 190 metra, e cila do të sjellë nga Houston (Teksas-SHBA) një sasi prej 24.193 ton qymyr, porosi e kompanisë kosovare “Lab Oil”.
Që nga fillimi i javës kjo është e treta anije që ankorohet në Terinalin Lindor të cilat po përpunojne sasi të mëdha qymyri dhe çimento.
Aktualisht në kalatën 10 të këëtij Terminali po ngarkohet me 12.500 ton [imento për eksport anija “Sirios Cement 1”, e cila që nga fillimi i vitit ka mbërritur në port më shumë se 15 herë, duke u ngarkuar mesatarisht me 10 mijë ton çimento për eksport në çdo lundrim. Ditën e hënë në të njejtin Terminal përfundoi përpunimi i anijes “UBC Tokyo”, e cila ka sjellë 21.824 ton qymyr, porosi e kompanisë “Antea Cement” në Fushë Krujë.
Jahti 86 metra “I Dinasty”, nga Spanja në portin e Durrësit
3 tetor 2017
Në kalatën 1 të portit pasditen e së hënës u ankorua jahti “I Dinasty”, një nga anijet turistike luksoze që kanë mbërritur gjatë stinë së verës në portin më të madh të vendit.
Nga Qendra e Informacionit në APD mësohet se jahti “I Dinasty” ka lundruar nga njëri prej porteve të Spanjës drejt Durrësit.
Jahti me gjatësi 86 metra, i regjistruar në George Toën dhe me flamur të ishujve Kaiman ka qëndruar në Durrës deri në orën e para të ditës së martë.
Nga Sektori i Statistikave në APD, mësohet se gjatë këtij viti janë ankoruar për herë të parë në Durrës një numër i madh jahtesh luksoze, me gjatësi deri në 100 metra, të cilat përveç qëllimeve turistike dhe të shërbimit, kanë sjellë edhe mysafirë edhe për bisedime me autoritetet shqiptare.
Kroçera “Seven Seas Voyager” me 687 turistë, nesër në port
3 tetor 2017
Nesër paradite në portin e Durrësit do të ankorohet kroçera “Seven Seas Voyager” me 687 udhëtarë në bord. Anija do të lundrojë gjatë natës nga Argostoli (Greqi) drejt Durrësit, ndërsa pas qytetit tonë do të vijojë drejt Kotorrit (Mali i Zi).
Burime nga agjencia pritëse “Intermed Shiping”, bëjnë të ditur se 472 nga udhëtarët e kroçerës që do të ankorohet nesër vijnë nga SHBA, 57 nga Britania e Madhe, 37 të tjerë nga Australia dhe 32 nga Kanadaja. Pjesa tjetër janë qytetarë nga 23 vende të botës, si Suedia, Katari, Hungaria, Hong Kongu, Luksemburgu, Hollanda, etj. Anija turistike me gjatësi 206 metra do të ankorohet në kalatën 5 të portit, dhe do të qëndrojë në Durrës deri në orën 18.00.
Nga Qendra e Informacionit në APD, mësohet se nga 9 – 28 tetor në kalatat 4 dhe 5 do të ankorohen edhe kroçerat “Prinsedam”, “Ocean Majesty” dhe “Serenissima”, të fundit për vitin 2017. Kroçera “Ocean Majesty” do të lundrojë dy herë drejt Durrësit, më 13 dhe 28 tetor. Ndërkaq, bashkë me “Ocean Majesty” më 13 tetor do të mbërrijë në Durrës edhe kroçera “Serenissima”.
Gjatë qëndrimit në vendin tonë turistët vizitojnë qytetet e Durrësit, Krujës, Beratit dhe Tiranës.
Janar-shtator 2017 :
Tragetet, 40.342 udhëtarë dhe 11.214 autovetura më shumë se 9 muajt 2016
3 tetor 2017
Gjatë periudhës janar-shtator të këtij viti tragetet e linjave Durrës – Bari dhe Durrës – Ankona – Trieste e kthim kanë transportuar më shumë mallra dhe më shumë udhëtarë se sa në të njejtën periudhë të vitit 2016.
Tragetet janë shfrytëzuar nga 743.385 udhëtarë shqiptarë dhe të huaj gjithsej, një shifër 6 përqind më e lartë se sa 9-mujori i parë i vitit të kaluar – bën me dije Sektori i Statistikave të APD.
Megjithëse ka patur një rritje prej 5 përqind, krahasuar me 9-mujorin e vitit të kaluar, numri i udhëtarëve në hyrje mbetet më i ulët se sa ai i udhëtarëve, mbi 395 mijë, që nisen nga Durrësi drejt porteve të Adriatikut perëndimor.
Në të njejtën periudhë tragetet kanë transportuar 156.599 autovetura, ose 8 përqind më shumë se se në 9-mujorin e parë të vitit 2016.
Gjatë kësaj periudhe tragetet kanë kryer 766 lundrime gjithsej.
Maturantë nga Kosova vizitojnë Terminalet e portit
5 tetor 2017
Një grup nxënësish kosovarë kanë vizituar sot portin e Durrësit. Të shoqëruar nga punonjësit e Forcës së Sigurisë Portuale ata kanë vizituar kalatat e e Terminalit Perëndimor dhe janë njohur me karakteristikat e portit më të madh të vendit.
Rreth 40 nxënës maturantë që vizituan portin vijnë nga nga shkolla “Kongresi i Manastirit” në qytetin e Porozhanit. Ata kanë vizituar më parë qytetet e Vlorës, Krujës dhe Tiranës, ndërsa sot në ditën kushtuar Durrësit para se të vijnë në portin më të madh të vendit kanë vizituar Amfiteatrin antik, si dhe Muzeun arkeologjik të qytetit.
Janar – shtator 2017 :
Tragetet, 33 lundrime më pak, më shumë mallra dhe kamjonë e trajlerë
5 shtator 2017
Në 9 muajt e parë të këtij viti, bashkë me udhëtarët dhe autoveturat, tragetet kanë transportuar 596.562 ton mallra të ndryshme, të ngarkuara në kamjonë dhe trajlerë. Krahasuar me të njejtën periudhë të vitit të kaluar rritja e volumit të mallrave ka qenë 7 përqind – bëjnë të ditur nga Sektori i Statistikave në APD.
Megjithëse numri i lundrimeve ka qenë 4 përqind më i vogël, sasia e udhëtarëve, mallrave dhe mjeteve të transportuara me tragete ka qenë më e lartë – shtuan burimet.
Në periudhën janar-shtator të këtij viti tragetet e linjave Durrës – Bari dhe Durrës – Ankona – Trieste e kthim kanë transportuar afro 54 mijë dhe trajlerë të ngarkuar me mallra të ndryshme, ose 9 përqind më shumë se sa gjatë së njejtës periudhë të vitit 2016.
Sasia e mallrave në hyrje arrin në 373.667 ton, ndërsa në dalje nga Durrësi me mallra eksporti shkon në 222.895 ton.
Përfaqësuesit e kompanisë ÇIMSA Cement nga Turqia, vizitë në port
5 tetor 2017
Një grup përfaqësuesish të binesit turk kanë vizituar sot pasdite portin e Durrësit.
Grupi i përfaqësuesve të kompanisë ÇIMSA Cement me qendër në Stamboll u interesuan për kushtet e përpunimit të aijeve me çimento që mbërrijnë në portin më të madh të vendit tonë.
Ata u ndalën në kalatën 1 ku po përpunohet anija “Gulf City” me 3390 ton çimento.
